Paga Minima Nazzjonali

​

Għas-sena 2023, il-paga minima nazzjonali fil-ġimgħa ta’ impjegati whole-time hi:

Jeżistu pagi minimi oħra li huma applikabbli għal xogħlijiet differenti f’setturi industrijali speċifiċi. Kull impjegat huwa intitolat għal bonus statutorju u l-weekly allowance.

* Ma’ għeluq sena fl-impieg mal-istess prinċipal, l-impjegati jkunu intitolati għal żieda mandatorja ta’ €3 kull ġimgħa, u ma’ għeluq it-tieni sena fl-impieg, għal żieda addizzjonali ta’ €3 oħra kull ġimgħa. Iż-żidiet għandhom jitħallsu lill-impjegati fuq bażi pro-rata.

Ftehim Nazzjonali dwar il-Paga Minima Nazzjonali ffirmat mill-Imsieħba Soċjali fit-28 ta’ April 2017 u effettiv permezz tal-Avviż Legali Nru.144 tal-2017​.

1.  Impjegati illi jitħallsu l-paga minima fil-ġimgħa jew paga ekwivalenti għall-paga minima, għandhom, mat-tlestija tal-ewwel sena fl-impieg mal-istess prinċipal, ikunu intitolati għal suppliment mandatorju kif ġej:

     (a) tliet ewro (€3) fil-ġimgħa li jibdew jitħallsu mill-bidu tat-tieni sena fl-impieg biex il-paga bażika tal-impjegat konċernat tkun il-paga minima fil-ġimgħa ttoppjata bi tliet ewro (€3); u

     (b) mat-tlestija tat-tieni sena, għal tliet ewro (€3) oħra fil-ġimgħa li jibdew jitħallsu mill-bidu tat-tielet sena fl-impieg biex il-paga bażika tal-impjegat konċernat tkun, minn dik is-sena ’il quddiem, il-paga minima fil-ġimgħa ttoppjata b’sitt ewro (€6).

2.   Impjegati illi huma mħallsa aktar mill-paga minima fil-ġimgħa, sew jekk bis-saħħa ta’ xi liġi, regolament jew ordni, jew bis-saħħa ta’ xi kuntratt ta’ impieg, għandhom, mat-tlestija tal-ewwel sena ta’ impieg mal-istess prinċipal, ikunu intitolati għal dak il-porzjon tas-supplimenti mandatorji kif imsemmija fil-punt numru 1 hawn fuq sabiex il-paga minima fil-ġimgħa tagħhom ittopjata bl-ammonti msemmija ma taqbiżx il-paga minima fil-ġimgħa.

3.  Dawk l-impjegati illi, fit-28 ta’ April 2017, kienu diġà lestew minn tal-inqas sena fl-impieg mal-istess prinċipal u li jitħallsu l-paga minima fil-ġimgħa jew li jitħallsu paga fil-ġimgħa ekwivalenti għal paga minima, għandhom ikunu intitolati għas-supplimenti mandatorji kif imsemmija fil-punt 1 hawn fuq kif ġej:                                                

  ​ (a) b’effett mill-ewwel (1) ta’ Jannar tal-2017, it-tali impjegati għandhom ikunu intitolati għall-aġġustament ta’ tliet ewro (€3) fil-ġimgħa skont punt numru 1;

     (b) fis-sena 2018, it-tali impjegati għandhom ikunu intitolati għall-aġġustament sa massimu ta’ tliet ewro (€3) fil-ġimgħa skont punt numru 1; u

      (ċ) fis-sena 2019, it-tali impjegati għandhom ikunu intitolati għall-bilanċ biex jilħqu b’kollox iż-żieda ta’ sitt ewro (€6) fil-paga minima tagħhom, sakemm l-impjegati f’dik is-sena jkunu ilhom fl-impieg mal-istess prinċipal, minn tal-anqas tliet snin.

4.   Il-kliem "impieg mal-istess prinċipal" għandu jfisser impieg mal-prinċipal illi kien ingaġġah oriġinarjament u jinkludi entitajiet oħra fl-istess group of companies li minnhom jagħmel parti l-prinċipal.

5.   Impjegat li huwa intitolat għas-supplimenti mandatorji skont dan il-ftehim u li huwa ingaġġat b’kuntratt ta’ impieg definit skont l-Att dwar l-Impiegi u r-Relazzjonijiet Industrijali jew skont xi leġislazzjoni sussidjarja maħruġa taħtu, ma għandux, mal-iskadenza tal-kuntratt definit ta’ impieg tiegħu, ikun sostitwit b’impjegat ieħor sal-massimu ta’ sena mid-data tal-iskadenza tal-kuntratt sakemm il-prinċipal ma jinfurmax lill-impjegat illi hemm raġuni ġusta u suffiċjenti illi jiġi sostitwit u ma jgħidx speċifikament dik ir-raġuni ġusta u suffiċjenti x’inhi bil-miktub; 

    

     Fir-rigward ta’ impjegat intitolat għas-supplimenti mandatorji skont  dan  il-ftehim  u  li  huwa  ingaġġat b’kuntratt ta’ impieg definit skont l-Att dwar l-Impiegi u r-Relazzjonijiet Industrijali jew skont xi leġislazzjoni sussidjarja maħruġa taħtu, jekk, fi żmien sitt xhur mill-iskadenza tal-ewwel kuntratt ta’ impieg, it-tali impjegat jiġi offrut kuntratt ieħor ta’ żmien fiss, iż-żewġ perjodi għandhom jiġu kkunsidrati bħala perjodu wieħed kontinwu."​