Il-ġenituri prospettivi li jirċievu prokreazzjoni medikament assistita, huma intitolati għal mitt siegħa leave imħallsa kollha mill-impjegatur bejniethom, indipendentement minn tipi oħra ta’ intitolamenti għal-leave. Dan japplika b’mod irriespettiv għall-proċeduri kemm jekk isiru f ’Malta kif ukoll jekk isiru barra minn Malta.

Jekk iż-żewġ ġenituri prospettivi jkunu f’ impjieg, il-ġenitur prospettiv li huwa l-persuna riċeventi għandu jkun intitolat għal sittin siegħa leave, filwaqt li l-ġenitur prospettiv l-ieħor huwa intitolat għal erbgħin siegħa leave, u jistgħu jeħduh fl-istess ħin kemm jekk impjegat mal-istess jew ma ’prinċipali differenti. Jekk wieħed biss mill-ġenituri prospettivi jkun f’ impjieg, is-sigħat ta’ leave għandhom jitgawdew skont jekk il-ġenitur prospettiv impjegat ikunx qed jaġixxi bħala l-persuna riċeventi (sittin siegħa) jew le (erbgħin siegħa).

Il-ġenitur prospettiv għandu jipprovdi prova lill-prinċipal li huwa l-persuna riċeventi jew mhux riċeventi, u prova dwar l-istatus tal-impjieg tal-ġenitur prospettiv l-ieħor.

Id-dritt għal mitt siegħa leave għall-prokreazzjoni medikament assistita b ’paga sħiħa għandu jingħata għal kull proċess sa massimu ta’ tliet proċessi.

Impjegat li jkollu l-intenzjoni li jagħmel użu minn dan il-leave għandu jinforma lill-prinċipal bil-miktub mill-inqas ġimagħtejn (2) qabel, u jinkludi ċertifikazzjoni bil-miktub mit-tabib inkarigat minn tali proċedura.